Літаратура ў каардынатах часу: выбраныя працы. – Мінск: МДЛУ, 2024. – 232 с. (Лысова Н.Б.)

Abstract

Кніга Ірыны Аляксееўны Бурдзялёвай называецца «Літаратура ў каардынатах часу». Часовыя каардынаты агляду даследчыцай беларускага літаратурнага працэсу – амаль чатыры стагоддзі, з XVII ст. па XXI ст. Пазначаны вучонай і прасторавыя каардынаты: неаднаразова ў кнізе гучаць паняцці топасу, геапаэтыкі – таму што размова ідзе аб беларускай прасторы, зафіксаванай ў мастацкім слове, або аб сусветнай прасторы вачыма суайчынніка, які вымушаны «існаваць на геапалітычным скрыжаванні ва ўмовах своеасаблівага «еўрапейскага скразняку», прасторы супрацьстаяння дзвюх цывілізацыйных сістэм Захаду і Усходу» [1, с. 195]. Такім чынам, у беларускай літаратуры зафіксаваны вобраз свету ад Сібіры да Турэччыны, ад сталічнага жыцця да быту шляхецкай або мяшчанскай сядзібы. Кнігу Ірыны Бурдзялёвай можна лічыць новым падарожжам па заблытаных шляхах беларускага літаратурнага «лесу», дзе існуюць кнігі як на польскай, так і на беларускай мовах, кнігі розных стылёвых варункаў і жанравых пазначэнняў.