Традыцыя шанавання Еўфрасінні Полацкай: генезіс, развіццё, сучаснасць. Аўтарэферат дысертацыі

Abstract

Традыцыя шанавання Еўфрасінні Полацкай была даследавана як самастойная цэласная з’ява на аснове назапашанага вопыту ў вывучэнні пытанняў кананізацыі падзвіжнікаў веры, агіяграфіі, гімнаграфіі і іканаграфіі розных чыноў святасці. Пры гісторыка-культурным даследаванні культу Еўфрасінні Полацкай былі выяўлены ўзаемасувязі розных аспектаў шанавання, якія паказаны ў развіцці. На аснове сабранай інфармацыі і апрацаваных дадзеных была вызначана храналогія ўзвядзення і геаграфічнае знаходжанне культавых помнікаў, асвячоных у імя Еўфрасінні Полацкай, што дазволіла вылучыць галоўныя этапы фарміравання і развіцця традыцыі шанавання прападобнай і вызначыць яго характэрныя рысы. Пры дапамозе мэтанакіраванага пошуку і далучэння новага фактычнага матэрыялу былі адноўлены і дапоўнены звёны складання і фарміравання традыцыі шанавання Еўфрасінні, якая была даследавана ў сваёй шматграннай цэласнасці і сукупнасці ўсіх складаючых (агіяграфія, гімнаграфія, храмавае будаўніцтва, іканаграфія) на працягу ўсяго перыяду існавання (з канца ХІІ да пачатку ХХІ ст.). Таксама былі выяўлены традыцыйнасць і спецыфіка культу Еўфрасінні Полацкай у кантэксце шанавання айчынных святых.