Антычная літаратурная традыцыя ў паэзіі М. Багдановіча і Э. Паўнда

Abstract

У артыкуле разглядаюцца агульныя і адметныя напрамкі творчасці Максіма Багдановіча (1891 – 1917) і Эзры Паўнда (1885 – 1972) у адносінах да антычнай літаратурнай традыцыі. Станаўленне мастацкай спадчыны беларускага і амерыканскага паэтаў адбывалася на аснове класічнай традыцыі, якая была крыніцай для пераймання найбольш актуальных вобразаў і матываў. Літаратурная спадчына антычнасці аказала значны ўплыў на творчасць паэтаў, якія ўсведамлялі неабходнасць засваення не толькі нацыяльных традыцый, але і багатага вопыту сусветнай літаратуры, менавіта антычнай. Багдановіча і Паўнда аб’ядноўвае імкненне распачаць адраджэнне ў сваіх краінах і прыўнесці ў нацыянальныя культуры здабыткі мінулага, аб’ядноўвае іх так званая «туга па сусветнай культуры», інтарэс да антычнасці як да «радзімы Еўропы», паколькі для іх антычнасць – гэта фундамент культуры.