Шкляныя бранзалеты з тэрыторыі старажытнага Турава: марфалогія і тэхналогія вытворчасці

Abstract

Артыкул грунтуецца на аналізе 715 экзэмпляраў шкляных бранзалетаў (матэрыялы даследаванняў П.Ф. Лысенкі 1968 і 1992 гг.) з тэрыторыі дзядзінца і вакольнага горада старажытнага Турава. Вызначыны ўнутраны дыяметр бранзалетаў, форма, колеравая гама і дэкор. Дыяметр большасці бранзалетаў упісваецца ў межы 5–6 см (82,1%), вырабы большага дыяметру – каля 7–8 см – складаюць 9,1%, экзэмпляры меншага дыяметра – каля 4– 4,5 см – 8,2%. Адносна формы пераважаюць вырабы гладкія акруглага сячэння (56,8%) і кручаныя (38,2%), значна менш экзэмпляраў падтрохвугольнага сячэння, плоска-выпуклых, рыфлёных і вітых. Колеравая гама вылучаецца дамінаваннем адценняў зялёнага, бірузовага і карычневага, у меншай ступені прадстаўлены вырабы сінія, фіялетавыя і жоўтыя, у адзінкавых экзэмплярах – з чырвонага заглушанага шкла. Дэкор маюць 13,3% вырабаў, самы распаўсюджаны спосаб – перавіццё жоўтай непразрыстай ніццю. Вылучана група вырабаў са спецыфічнай тэхналагічнай характарыстыкай – наяўнасцю металічнага дроту ўнутры шклянога абруча.